14 მაისს კასპელი ახალგაზრდების ინიციატივითა და ორგანიზებით, სკოლის მოსწავლეებისთვის ჩატარდა ინტელექტუალური თამაში „სკივრი“. ღონისძიება კასპის ტექნოპარკის სივრცეში გაიმართა.
კომლის კამპანიების კონკურსის გამარჯვებულმა გუნდმა ინიციატივით „უკეთესი მომავლის შესაქმნელად“, ევროკავშირის შესახებ სწორი და გადამოწმებული ინფორმაციის თანატოლებთან გავრცელების აქტიური პროცესი ინტელექტუალური თამაშის ორგანიზებით დააგვირგვინა. ერთი თვის განმავლობაში, გუნდის წევრებმა მოიარეს კასპის მუნიციპალიტეტის რამდენიმე სკოლა და საბოლოოდ, ევროკავშირის შესახებ კარგად ინფორმირებული ახალგაზრდებისთვის ჩაატარეს შემაჯამებელი ინტელექტუალური თამაში.
კონკურსის კითხვები შეეხებოდა ევროკავშირის ისტორიას, გეოგრაფიას, კულტურას, პოლიტიკას და საქართველოსთან ურთიერთობებს. ღონისძიებაში კასპის მუნიციპალიტეტის ექვსი გუნდი მონაწილეობდა. თითოეული მათგანი საოცრად მომზადებული ჩაერთო კონკურსში და შედეგად, აუცილებელი გახდა დამატებითი ტურის დანიშვნაც. ასეთ კონკურენტუნარიან გარემოში, საბოლოოდ, კასპის მე-3 საჯარო სკოლის გუნდმა, „Mighty Five” გაიმარჯვა!
აღსანიშნავია ისიც, რომ კაპიტნის ტურში, სადაც კითხვა მხოლოდ გუნდის კაპიტნებისთვის დაისვა, ურთულეს შეკითხვაზე სწორი პასუხის გაცემა მხოლოდ ერთმა მათგანმა, თვალადის სკოლის მოსწავლემ, ნათია აბულაძემ, შეძლო.
ინტელექტუალური თამაშის გამარჯვებული გუნდის, „Mighty Five” წევრებსა და კაპიტანს გუნდიდან „The Stars”, სსიპ „საინფორმაციო ცენტრმა ნატოსა და ევროკავშირის შესახებ“ თემატური ლიტერატურა და სიმბოლური საჩუქრები გადასცა, ხოლო კასპელმა მეწარმემ, რუსუდან ბარნოვმა – ხელნაკეთი ნივთები.
ღონისძიება გაიმართა სათემო ორგანიზაცია კომლის კამპანიების პროექტის „რატომ ევროპა?“ და კასპის ახალგაზრდული ფორუმის ფარგლებში. პროექტის ფინანსური მხარდამჭერია European Endowment For Democracy.
ინტელექტუალური თამაშის „სკივრი“ ეფექტიან ორგანიზებაში დიდი წვლილი შეიტანეს:
კასპის ახალგაზრდული საბჭო • Kaspi Youth Council-ის განათლების კლუბის ლიდერმა სალომე ნონიაშვილმა და კლუბის წევრებმა, მარიამ თეზელაშვილმა, ანა ხორგუაშვილმა, თეა დათუნაშვილმა, ანი წიკლაურმა, მარიამ მერებაშვილმა და ანასტასია კავთიაშვილმა.
