კამპანიის გუნდი შედგებოდა კასპის მუნიციპალიტეტის რამდენიმე სკოლის აქტიური მოსწავლეებისგან. მათ თავად დაგეგმეს და განახორციელეს მრავალფეროვანი შეხვედრები და აქტივობები ევროკავშირის შესახებ.

კამპანია ქალაქ კასპის მესამე საჯარო სკოლაში, მეცხრე და მეათე კლასელებთან ევროკავშირის შესახებ საინფორმაციო შეხვედრით დაიწყო. ახალგაზრდა სპიკერებმა თანატოლებთან ერთად ისაუბრეს ევროკავშირის შექმნის ისტორიაზე, მუშაობის პრინციპსა და გავრცელებულ ანტი-დასავლურ მითებზე.

კიდევ ერთი შეხვედრა ჩატარდა სოფელ კავთისხევის საჯარო სკოლაში. მოსწავლეებმა გაიღრმავეს ცოდნა ევროკავშირის საქმიანობისა და საქართველოსთან ურთიერთობის შესახებ.

საქართველოსა და ევროკავშირს შორის არსებულ კულტურულ მსგავსება-განსხვავებებს მიეძღვნა ვორქშოპი, რომელსაც კამპანიის გუნდის წევრები უძღვებოდნენ. შეხვედრის მონაწილე ახალგაზრდებმა იმუშავეს ჯგუფებში და არგუმენტირებულად დაასაბუთეს ევროკავშირში გაწევრიანების აუცილებლობა. მათ შესაძლებლობა მიეცათ, კრიტიკული მსჯელობის გზით, თანატოლებთან ერთად დაემსხვრიათ ევროკავშირის ქვეყნების შესახებ არსებული სტრეოტიპები.

ევროკავშირის შესახებ ბოლო საინფორმაციო შეხვედრას კასპის პირველმა საჯარო სკოლამ უმასპინძლა. მოსწავლეებმა გაიგეს უფრო მეტი ევროკავშირის განვითარების ისტორიის, მისი ღირებულებებისა და საქართველოსთან მრავალწლიანი ურთიერთობის შესახებ.

კამპანიის ინიციატორებმა ევროკავშირის შესახებ სწორი და გადამოწმებული ინფორმაციის გავრცელების აქტიური პროცესი ინტელექტუალური თამაშის „სკივრის“ ორგანიზებით დააგვირგვინეს. კონკურსის კითხვები შეეხებოდა ევროკავშირის ისტორიას, გეოგრაფიას, კულტურას, პოლიტიკას და საქართველოსთან ურთიერთობებს. ღონისძიებაში კასპის მუნიციპალიტეტის ექვსი გუნდი მონაწილეობდა.

კომლი მადლობას უხდის ახალგაზრდებს გამოჩენილი მაღალი სამოქალაქო პასუხისმგებლობისა და კარგად ორგანიზებული კამპანიის ჩატარებისთვის! ვაფასებთ თითოეული სკოლის თანადგომას, რომელმაც მხარი დაუჭირა ახალგაზრდების ინიციატივას!

კამპანიების პროექტის ფინანსური მხარდამჭერია European Endowment For Democracy